-------தூறல் நின்று போகும்-----

சிட்பண்ட்காரனின் தவணைக்குறுஞ்செய்தியோ

தவறவிட்ட பேருந்தோ
மளிகைக்கடை பாக்கியோ
மேலதிகாரியின் வசைபாடலோ
வங்கிக்கடன் வட்டியோ
கருகிவிட்ட தோசையோ
மின்சாரமற்ற இரவோ
பாதியில் பழுதடைந்த மிக்சியோ
உச்சிவெயிலில் அறுந்துவிட்ட செருப்போ
வேலைப் பளுவோ
முட்டிவலியோ முதுகுவலியோ
மகளின் பள்ளிக்கட்டணமோ, வீட்டுப்பாடமோ, ஜலதோஷமோ
இன்ன பிறவற்றில் ஏதோவொன்றோ
அல்லது இவையெல்லாமோ சேர்ந்து
கொஞ்சம் கொஞ்சமாய்க்
கலைத்துவிடக்கூடும்


மழைநேரத்தில்
உன் அருகாமை நிகழ்த்திய
ரசவாதத்தை