நீரின்றி அமையும் வீடு

நேற்றிரவிலிருந்து தண்ணீர் வரவில்லை
ஆர்த்தியின் வீட்டில்
காலைக் கடன் கழித்தல் முதல்
அடுப்படியின் அத்தனை முஸ்தீபுகளும்
அல்லோலகல்லோலமாயின அவள் வீட்டில்

தன்னாலொன்றும் செய்ய இயலாமைக்கு
ஃபேஸ்புக் சாட்டில் வருத்தம் தெரிவித்திருந்தார்
மகன் வீட்டுக்குக் கடல் கடந்து சென்றிருக்கும்
அபார்ட்மென்ட் செகரட்டரி

தொந்தரவு செய்யாதே எனும் பொருளில்
ஆங்கிலத்தில் வைதபடி தொடர்ந்தது
நைட்ஷிஃப்ட் முடிந்துவந்த கணவனின் தூக்கம்

அங்கேயிங்கே ஃபோன் செய்து
அவரை இவரைப் பிடித்து
அலைந்தும் திரிந்தும்
மத்தியான நேரத்தில்
தண்ணீர் வந்துவிட்டது
ஆர்த்தியின் வீட்டில்

வேலைகள் முடித்த ஆசுவாசத்தில்
டிவியை முடுக்கிவிட்டு அமர்ந்தவள்
ஏதோ ஒரு கூட்டம்
ஏதோ ஒரு அணைக்காக
கோஷமிட்டுக் கொண்டிருந்த சேனலை
எரிச்சலுடன் மாற்றிவிட்டு
பிரியமான நெடுந்தொடருக்குத்
தாவிக் கொண்டிருந்தாள்
தண்ணீரை வென்றெடுத்த ஆர்த்தி